Կոտայքի մարզում մահացած 24-ամյա աղջիկը նոր էր ամուսնացել, վարձով էին բնակվում ամուսնու և եղբոր հետ

Կոտայքի մարզի Քասախ համայնքում այսօր՝ հոկտեմբերի 16-ին, մահացած 24-ամյա կինն ու անգիտակից վիճակում հայտնաբերված տղամարդիկ վարձով էին ապրում։ News.am-ի հետ զրույցում տան սեփականատերը պատմեց, որ մեկ ամիս առաջ էր վարձակալության հանձնել բնակարանը ընտանիքին: 

«Մի քանի օր է` բողոքում էին, որ իրենց վատ են զգում, սննդից թունավորվել էին երևի: Հիվանդանոց չէին դիմել, դեղատնից դեղ էին գնել ու խմել։ Նոր էին ամուսնացել, աղջիկը 24 տարեկան էր, տղան մոտ՝ 30: Աղջկա եղբայրն էլ էր նրանց հետ ապրում»,-պատմեց տան տերը:

Տան սեփականատերը պատմեց, որ առավոտյան կնոջ մայրը, որը նույն գյուղում է բնակվում, եկել է դստեր տուն, դուռը թակել, սակայն որևէ մեկը չի բացել. «Մեզ խնդրեց, փեսաս լուսամուտով մտավ տուն ու տեսավ, որ երեքն էլ անգիտակից են:

Շտապօգնություն զանգեցինք, աղջիկն արդեն մահացած էր, տղաների կյանքը հաջողվեց փրկել, նրանք տեղափոխվեցին հիվանդանոց»:  Տան սեփականատերերը բացառեցին գազի արտահոսքի վարկածը, նշելով, որ դեպքի վայր ժամանած ոստիկանության աշխատակիցներն էլ ստուգել են, և ֆիքսել, որ գազի հոտ չի զգացվում:

«Մի քանի օր առաջ տղաներից մեկի ծնունդն էր, ծննդյան տորթն ու աղցանները դեռևս սառնարանում էին գտնվում: Ենթադրում եմ, որ հենց սննդային թունավորում է եղել: Երբ տուն մտանք, նկատեցինք նաև փսխումների հետքերը»,-պատմեցին տան սեփականատերերը

Источник: https://ipress.am/hy/page/%D5%AF%D5%B8%D5%BF%D5%A1%D5%B5%D6%84%D5%AB-%D5%B4%D5%A1%D6%80%D5%A6%D5%B8%D6%82%D5%B4-%D5%B4%D5%A1%D5%B0%D5%A1%D6%81%D5%A1%D5%AE-24-%D5%A1%D5%B4%D5%B5%D5%A1-%D5%A1%D5%B2%D5%BB%D5%AB%D5%AF%D5%A8-%D5%B6%D5%B8%D6%80-%D5%A7%D6%80-%D5%A1%D5%B4%D5%B8%D6%82%D5%BD%D5%B6%D5%A1%D6%81%D5%A5%D5%AC-%D5%BE%D5%A1%D6%80%D5%B1%D5%B8%D5%BE-%D5%A7%D5%AB%D5%B6